Жыл сайын қолданыстағы мемлекеттік сатып алу заңнамасына өзгерістер мен толықтырулар енгізіліп, жетілдіру шаралары жүйелі түрде жүргізіліп келеді. Дегенмен, проблемалық мәселелер аз емес. Осыдан болса керек, Мемлекет басшысының 2022 жылдың 1 қыркүйегіндегі «ӘДІЛЕТТІ МЕМЛЕКЕТ. БІРТҰТАС ҰЛТ. БЕРЕКЕЛІ ҚОҒАМ» атты жолдауында мемлекеттік сатып алудың жаңа жүйесі жасалып, бағаның төмендігі ғана емес, тауарлар және қызметтердің сапасы бірінші кезекте болып, мемлекеттік және квазимемлекеттік сатып алулардың бірыңғай платформада жасақталуы үшін мемлекеттік сатып алу туралы жаңа заңнама қабылдау қажеттілігін атап көрсетті. Жаңа Заңдылықта қойылатын талаптар барынша қысқартылып, рәсімдік нормаларды мемлекеттік сатып алуды жүзеге асыру қағидаларында көздеу жоспарлануда. Зерттеу аясында қолданыстағы мемлекеттік сатып алу механизмдерінде кездесетін бірқатар проблемалық мәселелер негізделе келе, оларды шешу жолдарын ұсыну арқылы ЖӨБО мемлекеттік сатып алу жүйесінің тетіктері қарастырылды.